|تجربه مع عياده كايا للبشره/ حب الشباب|

الخميس، 5 فبراير 2015

بسم الله الرحمن الرحيم 

اليوم ان شاء الله اكلمكم عن عياده كايا وعلاجي فيها بالتفصيل الممل ،، اولا القصه ،بعده الاسعار،، وبعدين العلاج وايش يسوون لي بالجلسات ،، واخر حاجه المنتجات واسعارها .. رأيي بالاخير بحطه .. اتمنى تستفيدووو ..😘 منشنو بنات ،، الموضوع يتثبت بالمدونه لأهميته 



اولا القصه:
بعد العيد الاضحى بكم يوم ،، بشرتي تغيرت بشكل مخيف ،، حبوب متروووووسه وصخ ، وملتهبه وحمرا وتعورني كثثثير ! طبعا السبب مجهول . ما اكلت حاجه غير المعتاد ف العيد ، ولا كثرت حلويات  او استخدمت منتجات جديده ع بشرتي! ثقتي بنفسي ضعفت بشكل كبير 💔 صرت ما اتخلى عن الفاونديشن والكونسيلر بكل طلعه ، وخاصه لما اروح ادرس لازم فوولً كفر ، ولما احد يركز علي ابعد وجهي ! باختصار الثقه صفر ،، انتظرت وانتظرت ، حاولت اعالجها مثل ما تعودت على العلاجات الخفيفه لحبوبي المعتاده بسً ما فيه فايده ، الحال تسوءً 😢 فقدت كل امل ان بشرتي تتحسن بعلاجاتي ،، كلمت امي ، ما قدرت اتحمل، بحثت وطلعت ارقام العيادات ، مركز الخليج ،، مركز الامارات الطبي ،، وعياده كايا .. رسلت الارقام لأمي وامي اتصلت تلقائيا بكايا لانها سمعه ومشهوره واكيد زينه على كلامها .. وهنا بديت .. 


بعياده كايا فيه دكتورتين ،، وحده هنديه ، الثانيه عمانيه ،، انا لما بحثت كان الكل يمدح العمانيه الدكتوره مزنه وسمعت انها خبره ٢٥ سنه .. طبعا لما انحجز اول موعد خبرتهم اريد الدكتوره مزنه ❤️ 


الاسعار :
تدخلين عند الدكتوره وتفتحيً ملف ب ١٥ ريال عماني
علاجي كلف ٣٧٥ ريال عماني ،، تدفعين ١٨٨ ريال اول جلسه ،، وبعد ٤ جلسات ١٨٨ ريال الثانيه .
خذيت غسول ، مرطب ، تونر وواقي شمس وراح اذكر اسعارهم تحت ❤️


العلاج : 
التقيت بالدكتوره مزنه ، وشافت الحال الكسيفه 😢 ،، عطتني خيارين ،، حبوب الروكاتين، تجفف الجلد والجسم بشكل عام يجف وتتعب على كلامها وتتقشر الشفايف وكذا ،، والثاني جلسات علاج كل اسبوعين جلسه ،، امي تخاف علي من الحبوب واختارت لي الجلسات .. حددت لي الدكتوره ٨ جلسات ... فيً الجلسه ، اروح بشرتي نظييفه ما فيها شي ، فقط مرطب ،، والبنت اللي تشتغل تنظفها ع الخفيف ، بعدها تحط لي حمض السالساليك او الصفصاف بنسبه ٣٠٪ مده دقيقين الى ثلاث دقايق ،، يحررق ، بس تمرر لي مروحه تبرد الالم ، بعدها تشيل الحمض بفوطه فيها ماي مثلج وتحط لي ماسك مرطب ثقييل مده ربع ساعه ،، بعد ما تشيل الماسك تحط لي واقي شمس وخلاص .. 

عاد بشرتي تجف ،، وتتقشر بشكل كبيييير طول مده الاسبوعين ليين الجلسه الجديده ، وكذا . وبكل جلسه او جلستين تقريبا يزيدو من قوه الحمض 





المنتجات :
خذيت مجموعه منتجات تُصنع فقط بمختبرات خاصه بكايا .. اسعارهم جدا مبالغه وما بمتناول اليد للاسف




اولا: غسول مرطب ،، تنظيفه عميق ولطيف ، ما جفف بشرتي ، خفف حتى المسامات ،، عجيب ❤️ سعره ١٥ ريال 




ثانيا : تونر ،، سعره كأنه فاونديشن شانيل 😤 مبالغ ، ٢٦ ريال عماني ،، ما شفت تغير ، كأني حاطه ماي ، خساره فلوس للاسف




ثالثا: مرطب ،، حلو ،، تمتصه البشره بسرعه ،، مناسب لتحت الميك اب ، ما فيه حاجه مميزه جدا ، وسعره ٣٢ ريال ومبالغ فيه



رابعا: واقي شمس ،، spf30 عادي جدا ،، نسيت اصوره بس بحجم راحه اليد ما من كبره ، وسعره ٢٦ ريال لو ما خاب ظني 


خامسا: لوشن لفروه الراس ،، يساعد بتقليل القشره ، مفعوله حلو وسريع ، اهم حاجه الاستخدام المستمر ،، ثلاث مرات اسبوعيا ،، بعد غسيل الشعر ولما تكون الفروه شبه جافه تدلكينه على فروه شعرك ،، سعره ١٥ ريال 




طبعا كل المنتجات اللي ذكرتها عاديه جداا ،، حتى الدكتوره مزنه نصحتني ببيوديرما ، بس الموظفات الله يهداهم يقنعوك بالشي غصب 🙆تعرفون سوالف التسويق وكذا ،، الزين انهم ما خربو بشرتي ،، ولا هيجوها ،، ولو انصحكم بحاجه بيكون الغسول ولوشن القشره فقط.


رأيي :
ايجابيات :
بشرتي تحسنت من الجلسه الرابعه ،، خفت الحبوب واللحين راحت ، اتمنى م تطلع مستقبلا لاني بنتف شعري وانتحر 😂😂💔 ههه ،، المعامله جدا روعه ،، هاااي كلاس بشكل عام ، يخدموك صح، والموظفات حلاتهم وشغلهم روعه 


سلبيات:
العياده غاليه جدا جداااا ،، والله لما اروح بس زبونتين ثلاث ! محد فاضيه ! غاليه غاااليه ، اسعار المنتجات غاليه واسعار الجلسات بعد 💔 فيه وحده موظفه جابت لي العيد ،، صدددعت من كثر ما تحرك راسي وبقوه ! عكس البنات الثانيين برقه ودك تنامين ههههه بس للاسف ما اعرف اسمها 💔 
.
شًي واحد كريه صار لي ،، بوحده من الجلسات الموظفه اللي اقولكم هفست فيني حطت الحمض تركيزه مبالغ ع بشرتي ، واحترقت !! يعني صارت سودا خطين واضحين بخدودي ! رباااه اسبوعين الحرق يتقشر ومهما غطيته بالكونسيلر والفاونديشن ما فيه فايده 💔 وفوق هذا يتقشرر 

وخلصت ! وخلص علاجي ،، وبشرتي رجعت احسن عن اول ولله الحمد ، ماشاء الله ماشاء الله 


أرقام العياده 
شارع الصاروج / شاطئ القرم / مسقط


اتمنى استفدتو من تجربتي واخذتو نظره عن العياده والاسعار وكل حاجه .. تابعوني ع الانستجرام 
_sparklista

انتهى 
 
site design by designer blogs