| ريفيو لجهاز التنظيف كلاريسونيك ♥ Calrisonic Review |

الأحد، 5 يوليو 2015

السلام عليكم ورحمه الله وبركاته 


تدوينه اليوم هي التدوينه المنتظره من ٣ شهور وحاجه تقريبا !  راح اتكلم عن جهاز كلاريسونيك المشهور اللي اشتهر اكثر حاجه السنه الماضيه وسبب ثوره كبيره ..  




اولا، نبذه بسيطه عن كلاريسونيك: جهاز تنظيف كهربائي للوجه وممكن للجسم ، الجهاز فرشته تعمل بالذبذبه مش بالدوران وراح افصل الموضوع هذا،، ينظف البشره بعمق مع تقشير لطيف وازاله الخلايا الميته بمده عمل ٦٠ ثانيه، ويستعمل مرتين في اليوم او مره ،، كما ان الشركه تزعم انه ينظف البشره ٦ مرات احسن عن تنظيف ليد العادي♥ 

الجهاز: ضد الماء ينفع تستعمليه في الشاور ، شحنه يضل اسبوع وشي مع الاستخدام اليومي ، يتوفر بعده انواع ميا وميا ٢ واريا وغيرهم ،، تحصلونهم عند التاجرات او بسيفورا .. اخذت ميا من ساره ب ٥٥ ريال (@sara_makeuponline)


الفرشه : بالنسبه للفرشاه فهي الجزء الوحيد اللي لازم تاخذي باعتباره كونها لازم تتغير كل ٣ شهور، الفرشاه مهما اعتنيتي فيها ونظفتيها تقدم وتتوسخ وممكن تأذيك لذلك تحطي ببالك انك بتصرفي مبلغ لفرشاه جديده كل ثلاث شهور .. 
بالنسبه لشغل الفرشاه فهي جزئين، الجزء الداخل يعمل بالذبذبه عشان ينظف البشره عددل والمسامات بدل الدوران في اتجاه واحد، اما الجزء الخارجي فهو ثابت عشان ما تعتفس الدنيا كلها ماي وغسولك .. وشعر الفرشاه دقيق جدددا يسمح لها تنظف المسامات بشكل اكبر .. 

اول ما تاخذي الجهاز تطلع الفرشاه للبشره الحساسه ، وفيه عاد انواع متعدده من الفرش تشتريها على حده ، للمسامات والبشره الحساسه والبثور والعاديه.. تحصلون الفراشي عند التاجرات او بسيفورا ، اخذت فراشي الحبوب  فرشتين ب ٢٦ ريال من المزروعيه (@almazroia)

الصوره هذي توضح فرشه عمرها ٣ شهور وفرشه جديده فريش << فرق
 



تجربتي بعد ٣ شهور متواصله من الاستخدام :
استخدمتها يوميا، مره او مرتين على حسب حاجتي بغسول كلاريسونيك اوغسولي الاعتيادي، تنظيفه بالفعل عمييييق ويشيل كامل الاوساخ وبقايا المكياج ،، لما امرر قطن مع تونر بعد ما استخدم كلاريسونيك ما اشوف اي بقايا للميك اب ،، اما لما اكسل وما استخدمها وامرر تونر تطلع بقايا الميك اب واضحه على القطن .. تصغر المسامات بشكل ملحوظ وتحسن من البشره نفسها.. صرت ما استغنى عنها لااازم بروتيني موجوده واحس فيه حاجه ناقصه لو ما استخدمتها ولما اسافر معاي، قويه وتتحمل الصدمات لما تطيح علي احيانا، وطبعا اهم حاااجه ضد الماي ♥ 
اخذت ميا ١ شخصيا لان بشرتي ما تتحمل سرعه اكثر ،، اختاري الجهاز اللي يناسب بشرتك ! 

ايضا نقطه واحده ! اللي هي الكلاريسونيك تستخدم اساسا لتنظيف البشره مش الميك اب ،، لا تخربو الفرشه بسرعه بسبب هذا الموضوع .. شيلي الميك اب بمزيل ميك اب وبعده استخدمي كلاريسونيك عشان تحصلي فايدتها بدل لا تكون اله تنظيف مكياج ♥ 

كلاريسونيك بالفعل جهاز روعه ويستحق كل الثوره اللي صارت حوله والمشاهير اللي مدحوه وغيرهم .. انصح فيه خاصه لتنظيف البشره بعد الميك اب الثقيل او الفاونديشنات اللي تكتم البشره وممكن تسبب حبووب ..


وخلصنا كامل الموضوع ،، اعذروني ع التآخير واتمنى استفدتو من التجربه .. حطو ارائكم وتجارب كلاريسونيك هنا او بالانستجرام عشان الباقي يستفيد مع ذكر نوع جهازك ،، واي استفسار انا موجوده بالسناب والانستا والايميل وهنا .. احبكم 


انتهى ♥ 

 
site design by designer blogs