|مفضلاتي ٢٠١٦ ♥ Best of Beauty 2016|

الجمعة، 6 يناير، 2017



السلام عليكم ورحمه الله وبركاته




كيفكم بنات ؟ ان شاء الله تكونو طيبين وبخير وكل عام وانتو بخير مع السنه الجديده مع انها جات متأخره بس متأخر ولا ما فيه بتاتا 


عموما،، موضوع اليوم هو نفس موضوع السنه اللي طافت اللي هو مفضلات السنه على العموم وترا البوست صغنن ما كثرت بالمفضلات لاني على سنه ٢٠١٦ ما كنت استخدم منتجات كثيره وفقط روتين بسيط بحكم الدوام والمشاوير وبس كنت اهتم ببشرتي ومنقطعه تقريبا معظم الاوقات عن مكياج الوجه 💆🏻..


نبدي بالوجه .. تكلمت قبل بالسناب شات اني ما استخدم الا البي بي كريم هذي السنه ..





 فكان اللي استخدمهم بي بي كريم ميشا تغطيه ميديوم الى فول كفر و نيكد سكين ون اند دون من اربن ديكاي اللي تغطيته خفيييفه جدا ..
 الاثنين حلوين .. استخدم ميشا لطلعاتي المهمه واربن ديكاي للصبح لاني ما احتاج تغطيه عادي للدوام .. انوه لكم ان اربن ديكاي خفيييفه التغطيه بالكاد يكون نفس التنتد كريم .. 



ميشا رقمي ٢٧ وهو غامق بس على صفار يجنن .. واخذته من امازون ب١٤ دولار 
اربن ديكاي اخذته من سيفورا ب١٥ ريال عماني تقريبا 




البودره والبرونز .. اللي يعرفوني يعرفو اني م احب البلشر كثير عشان الورديه العبيطه بوجهي 😅 فأحب البرونزر بشكل حتى احطه للصبح احس تعطي تقاسيم للوجه وحياه .. 
اللي استخدمتهم البرونزرين من شانيل والثاني من ان واي سي ..

 اللي من شانيل كريمي ويابنات على كثر استخدامي له الا انه ما قلت كميته ابداااااا يعني البيسه تتحلل فيه لو تحبي تستثمري ف برونزر .. ولونه جميل وهااادي ولما يندمج الفينيش جدا ناعم وطبيعي .. استخدمه للصبح والمناسبات احطه ووراه احط البرونزر الثاني👌🏻 .. كتبت بوست متكامل عن برونزر شانيل وسعره والسواتش والتاجره اللي اخذته منها اضغطي هنا 



برونزر ان واي سي الباودر .. لونه ناعم بس قوي .. ممتاااز وثباته عاالي عالي وسعره رخيص .. من الدرج ستور واخذته من امازون بعد .. احطه وحده او فوق برونزر شانيل للمناسبات 

اما البودره ف هي من بورجوا .. تغطيتها ميديوم .. ما تجفف ولا تشقق واحب استخدمها لتحت عيني وكامل وجهي .. عجييبه ومثل الزبده .. بسنتر بوينت تلقوها.. 





العيون والحواجب .. اكثر البنات يسألوني في السناب عن حواجبي .. حواجبي سودا بالطبيعه بس احط عليهم مسكارا بنيه ملونه عشان يصير اللوك انعم .. 

المسكارا الملونه اللي استخدمها من ايتود هاوس .. جميله واللون ثابت ويتوزع بتساوي ويصير الحاجب مرتب 👌🏻

وبعد استخدم مسكارا شفافه من بودي شوب .. قويه وحلوه وتترك لمعه خفيفه على الحاجب .. تكلمت عنها قبل سنتين تقريبا ولازلت احبها واستخدمها .. تثبت الحواجب ويصيرو مرتبين 👍🏻 ..




مسكارا العيون اثنينهم من سيفورا .. سماش بوكس اكس ريتد وتوفيسد بيتر ذان لوف .. اثنينهم حلوين .. يفرقو الرموش ويعطو ايحاء طول وتكثيف وسوادهم ممتاز وثباتهم عالي .. والاثنين فراشيهم شعر خفيف م هو السيليكون وهذي نقطه مهمه للتكثيف .. تلقوهم بسيفورا وعند التاجرات .. سعرهم بحدود ١٢ ريال تقريبا 

smashbox x-rated mascara





too faced better than love mascara





اخر حاجه منتجات الشفايف .. المحددات استخدمهم كأرواج والوان السنه كلهم نيود بحت او نيود على بينك خفيف بحط لكم اسماء المنتجات من فوق لتحت .. 
nyx lip liner - natural 
mac lip liner - soar
gosh volume lip shine - 02 
inglot
nyx soft matte lip cream - zurich 
tarte tip paint - tbt



وخلص البوست واتمنى لكم سنه جديده سعيده مليانه انجازات وسعاده.. ان شاء الله استفدتو ويعطيكم العافيه .. 
فولو سنابي isparklista 
فولو انستجرامي _sparklista

انتهى 🌹




| Kiehl's Midnight Recovery Concentrate Review ريفيو سيروم كيلز الليلي |

الجمعة، 21 أكتوبر، 2016

 السلام عليكم ورحمه الله وبركاته  



زمااان عن المدونه ☹️ اليوم راح اعرض رأيي عن سيروم الليل من كيلز .. midnight recovery concentrate 



اولا مزاعم الشركه ان السيروم راح  يجدد ويصلح بشرتك بحيث تصير انعم واملس وتظهر صحيه بحلول الصباح 💕

السيروم يحتوي على زيوت عطريه مختصه بالبشره واللي تقوم بمزاعم الشركه مثل اللافندر وزهره الربيع والسكوالين .. خالي من البرابين .. 

استخدمت الزيت لأكثر من ثلاث شهور يوميا بالليل كأول خطوه بعد التونر وعلى وجه نظيف .. احط منه ٥-٦ قطرات واطبطب على وجهي وبعدها اضغط بيدي على وجهي علشان الحراره اللي بتطلع راح تساعد البشره تمتص المنتج اسرع .. بعدها اكمل روتيني من مرطب وعلاجات ثانيه ..



تجربتي: بالفعل على المدى القصير اول ما اصحى الصبح بشرتي فيها نضاااره وصحيه ومليانه كأني مكثره ماي💦 .. المسامات شبه مخفيه .. بشكل عام تصير نديه ولينه وصحيه ،، على المدى الطويل .. الليونه والمظهر الصحي موجود بس لازززم الاستمرااار 👌🏻 ..



هل انصحكم فيه .. ايوه اذا ما عندكم سيروم او زيت ليلي لأنه مهم جدا بروتينك .. وايضا اذا كانت بشرتك محتاجه نضاره وحيويه .. جدا جميل .. 
اخذت السيروم من موقع نوردستروم بسعر ٤٦$ تقريبا ١٨ ريال .. سعره غالي شوي بس يبقى معك فتره طوويله .. 

رابط السيروم ..


اتمنى استفدتو من الريفو المبسط واشوفكم ان شاء الله بتدوينه قادمه 

انتهى 

instagram : _sparklista 
store: sparklista_store

| shop from amazon! طريقة التسوق من أمازون |

الثلاثاء، 31 مايو، 2016

السلام عليكم ورحمه الله وبركاته   

بهذي التدوينه بتكلم عن موقع امازون وطريقة الطلب منه .. السؤال اللي داايما تكرر علي من اول ما بديت اشرح عن التسوق اونلاين،، ف اتمنى يفيدكم وشرحي يكون بسيط وسهل ! 💪🏽

amazon.com


بالبداية راح تحتاجو اساسيات مهمه جدا ولاااازم تكون متوفره

١- ايميل .. اهم حاجه تقريبا انا اشوفها .. هو طريقه تواصل المواقع معك وعلشان تكونو عارفين اذا المبالغ انسحبت او الموقع شحن المنتج وغيره .. استخدمو ايميل واحد ويا حبذا لو تربطوه بجوالاتكم.. 

٢- بريد امريكي.. فيه كثير شركات توفر خدمات البريد العالميه ضمنها بريد امريكي وبريطاني وغيره.. خدمات مثل  myus/shop and ship/ world ship وغيرهم .. انا حاليا استخدم شوب اند شيب.. لو كنتو بتشحنو اغراض من اكثر من متجر افضل لكم تاخذون ورلد شيب او ماي يو اس لانهم بيرتبون الاغراض بكرتون واحد وبيوفر عليكم المبلغ .. 

البريد الامريكي وشركات الشحن موضوع جدا كبير بس ابدا ابدا ما صعب.. ما اقدر اشرحه بس راح احط لكم موقع وفيه طريقه فتح حساب لهذي الشركات وان شاء الله تستفيدو .. مدونه هناء مشروح فيها شرح مفصل وبسيط جدا .. 






لما يكون اللي فوق جاهز ،، كل حاجه بتمشي زين للي تحت 💕.. يالله بسم الله وهذي الواجهه لأمازون وعند شريط البحث ابحثو عن المنتج اللي تريدونه .. انا راح اطلب بور بنك انكر عليه تخفيض ممتاااز 😆(اساسا طلبته بس علشان اوريكم خطوات حقيقيه) بحط لكم الرابط تحت مع صوره المنتج لما استلمته 😍 




بعد ما القى المنتج واختاره راح اضغط على add to cart (اضافه لسله التسوق) 




فوق يمين موجوده cart وهي سله التسوق .. لو تضغطو عليها تلقو كل الاغراض اللي انتو طلبتوها .. 
بعد ما تخلصو كل اللي انتو تريدونه وخلاص مستعدين للدفع اضغطو على proceed to checkout



اللحين امازون راح يطلب منكم تسجلو عندهم .. لو كنتو مسجلين بس حطو الايميل والباسوورد نفس ما انا حطيت بالصوره .. اما لو كنتو بتفتحو حساب جديد فاضغطو على create your amazon account  



راح ياخذكم على صفحه التسجيل وعاد انتو تعبو نفس البيانات بالصوره (الاسم-الايميل-الباسوورد-تأكيد الباسوورد) بعد ما تخلصو اضغطو على create your amazon account 



راح ينقلكم اللحين لصفحه خيارات الشحن .. اللحين هنا راح تستخدمو البريد الامريكي وتعبو كل البيانات اللي عطوكم اياها شركه الشحن اللي موضحه بالصوره ( شركه الشحن راح تعطيكم هذي البيانات لا تكتبو عناوينكم الخاصه ببلدكم!) لما تخلصو اضغطو على ship to this adress 



راح ينقلكم مره الى صفحه خيارات الشحن علشان تختارو ايش نوع الشحن .. هل الستاندرد الاعتيادي (تقريبا ٥ ايام بس هو الارخص ) او شحن يومين او شحن يوم واحد وهو الاسرع بس له سعر ✋🏿.. 




واخيرا الدفع .. ما عندهم الدفع ب باي بال لذلك عبو باستخدام بطاقاتكم .. البيانات اللي تحتاجوها هو رقم البطاقه (اللي فوق) وتاريخ انتهاءها ومن ورا البطاقه الرقم السري يجي ٣ ارقام فقط .. وبس 🤗



اخر خطوه انكم تراجعو كل حاجه سويتوها بالخطوات السابقه العنوان والشحن وطريقه الدفع وكذا .. بعد ما تتأكدو ان كل شي صح اضغطو place your order وراح ينسحب المبلغ وتتم العمليه والحمدلله خلصنا 😻.. 



عاد لما توصل الشحنه لمقر شركه الشحن بأمريكا راح يرسلو لك ايميل على اساس انكم تدفعو مبلغ الشحن عشان يرسلو الشحنه لبلدكم .. تروحو وتدفعو من موقع شركه الشحن ويرسلو لكم الشحنه وخلاص ( شرح هذا الجزء ضمن شرح البريد الامريكي الرابط فوق) 👆🏻


وبكذا خلصنا شرح امازون الحمدلله ،، لو فيه اي سؤال او استفسار انا حاضره ارسلو لي بالاسك او الانستا او هنا او الايميل بكيفكم 🤓..


اللحين البور بنك اللي اخذته كان عليه تخفيض ٤١٪ ونزل سعره من ١٧ ريال عماني الى ١٠ ريال عماني .. 
هذي صورته .. القوه مدري ويش اسمها  13000 ومن ميزاته انه يشحن الايفون ٦ خمس مرات وسامسونج جالكسي اس ٦ ثلاث مرات ونص .. فيه تقنيه الشحن السريع .. وحجمه صغير نسبيا وغيره من الميزات شوفوه ع الرابط العرض لسه موجود لو حابين فرصتكم تاخذوه 👌🏻.. يجي معاه الضمان والكيبل وحقيبه للحفظ .. 




http://www.amazon.com/Anker-PowerCore-13000-Portable-Charger/dp/B00Z9QVE4Q?ie=UTF8&psc=1&redirect=true&ref_=oh_aui_detailpage_o00_s00


وبس .. اتمنى انكم استفدتو .. اللي تطلب تزود لي ههههه .. امزح ☹️ وتابعوني على الانستجرام والتويتر والسناب وكل مكاان وخلاص واحبكم 



انتهى 

instagram : _sparklista
twitter : misssundus
snapchat: only via DM on instagram
 
site design by designer blogs