بسم الله الرحمن الرحيم ♥

تدوينه اليوم عن مشترواتي بتنزيلات اخر السنه (٢٠١٥) وتتضمن السايبر مندي واشياء بسيطه .. طبعا هذي المره اول مره استغل هذي التخفيضات ،، بالسنه الماضيه نسييييت ولا دريت الا لما شفت الجماعه يحطو المشتروات ههههه بس السنه هذي حطيت منبه بجوالي وحددت المواقع اللي اريد اخذ منهم ..

اخذت من تخفيضات ايسوس ٧٠٪ ولحد اللحين مستمره التخفيضات الحقو عليها 

واخذت من موقع ذا بالم للسايبر مندي وصارت لي سالفه طوييله واخذت بقايا الموقع هههه

واخذت من بينيفت مجموعات 

بسم الله نبدي 

اول حاجه تخفيضات ايسوس، 

اخذت شوز اسود بتفاصل ذهبيه من قدام وبحديده الستراب و ستراب يجي حول الرجل ويعطي شكل مررره جميل وناعم لو تلبسي معه جينز ترفعيه او تنوره فوق الجوزه ههههه 

هذا وانا لابسته 

هذا رابطه بالموقع (اضغطي هنا) 

 قبل التخفيض ب ٢٥ دولار وسعره ٢٢ دولار بعد التخفيض .. يعني ٨.٥ ريال عماني 

اخذت بعد شوز فلات من بارك لين مع سترابين قدام فيهم ستدز سيلفر وكريستال ،، ناااااعم ناعم بقوووه مع اللبس وخفيف ومريح جداا جميل حبيته 

هذا وانا لابسته 

هذا رابطه بالموقع (اضغطي هنا)

 قبل التخفيض ب ٨٦ دولار وسعره ٢٩ دولار بعد التخفيض .. يعني ١١ ريال عماني

اخذت محفظه من ماركه مونكي  .. لونها روز جولد وخامتها عاكسه ،، حجمها مربعي ع راحه اليد ،، اساسا كنت ادور على محفظه لحقايبي الصغيره ،، فوقع الاختيار على هذي واللحين اخذها حتى بدون حقيبه .. تقاسيمها الداخليه منظمه كأي محفظه عاديه (بطايق،، مبالغ ورقيه وعملات نقديه ) 

هذا الرابط بالموقع (اضغطي هنا)

المحفظه ما عليها تخفيض ب ١٤.٥ دولار يعني ب ٥.٥ ريال عماني 

ننتقل لتخفيضات ذا بالم ،، حكااايتي مع السايبر مندي وذا بالم ،، في السايبر مندي ( الاثنين اللي تجي ورا البلاك فرايدي ) ذا بالم خصوماتهم ٥٠٪ ،، وكل العاااااالم ينتظرو اليوم هذا ،، انا معهم ههههه المهم ،، فأنا توقعت ان الترافيك بتصدم الموقع وراح يعلق شويتين ، فاللي سويته اني اخترت الباليتات والبلشرات والحمر المات وحفظت كل الروابط بالمفضله علشان اوصل بسرعه واحط بالكارت .. اووول ما بدت التخفيضات الساعه ٧ ،، يا بنااات الموقع ماااا يفتح من الزحمه ،، توقعت يصتك ايوا بس الموقع ما يفتح يكتب لنا خطأ خطأ اصتك تماااما ههههه ،، ذا بالم حاولو يعدلوه ف انتهى الموضوع انهم يمددو التخفيض ،، الاشياء اللي لحقت عليهم كانت كثيره وحطيتها بالكارت ،، رحت شوي عن لابتوبي ورجعت ادفع حصلت كللل شي حجزته خالص اوت اوف ستوك للاسسسف .. المهم اللي امداني اخذه قبل لا يخلص ،، بلشر هوت ماما وجلوس جمييل لحمي ع شويتين موف اسمه grrr ! ولمعه ايشادو منثوره بدرجهwork is overrated … قصه صح؟ تحملووني هههههههه

اخيرا عروض بينيفيت الجمييله صاحب احلى بااكيجنج واحلى ترتيب بالشحن .. اخذت مجموعتين وعطوني ساملز مسكارا ذي ار ريل وكريم العين وبرايمر بورفيشونال دورت روابطهم بس للاسف خالصين ..

المجموعه الاولى اسمها real tempting threesome  اخذتها ب ٢٤ دولار يعني ب ٩ ريال وشي .. فيها اي لاينر حجم كبير وميني مسكارا وميني ميك اب ريموفر 

المجموعه الثانيه اسمها glamouriety  فيها مسكارا باد جال لاش وهايلايت هاي بيم و برايمر بورفيشونال 

وبس هذي المشتروات ،، اتمنى استفدتو ،، بالنسبه لطريقه التسوق من ايسوس ف ادخلي (هذا الرابط) عشان تعرفي الطريقه  .. واحبكم 

تابعوني على الانستجرام (@_sparklista)

انتهى ♥

| جهاز الديرما رولر ♥ derma roller |

بسم الله الرحمن الرحيم ♥

بهذي التدوينه راح اتكلم بشكن مفصل عن الديرما رولر،، ايش هي و من هي الفئه المستهدفه وكيف طريقه الاستخدام الصحيحه وكل التفاصيل اللي ممكن تفيدكم .. للمعلومه الموضوع تكلمت عنه مسبقا بالسناب شات ،، اللي حابه تاخذ سنابي تكلمني دايركت على الانستجرام @_sparklista 

اولا، الديرما رولر عباره عن جهاز يدوي فيها مايكرونيدل اللي هي ابر صغيييره وتجي بأطوال مختلفه .. شغلته انه يحفز كولاجين البشره انه يشتغل اسرع ،، كيف؟ الابر هذي توهم البشره انه تصيبها جروح ،، فترسل الكولاجين الى المنطقه اللي انتي تحطي فيها الديرما رولر وبدل لا ترمم جرح ما موجود من الاساس ، راح ترمم بشرتك نفسها ( ندوب وعلامات وبقع ) .. علاج الديرما رولر متبع بعيادات البشره لكن المختصين بالبشره ما منعو استخدامها بالبيت ،، يعني ممكن تشتري وتستخدمي بنفسك ما هي خطيره .. 

الفئه المستهدفه اللي ممكن تستخدم الديرما رولر هي اللي تعاني من بقع ،، تجاعيد ،، حفر بسيطه ،، جروح تركت ندبات .. فيه مشاكل ثانيه ممكن تحلها الديرما رولر تقدرو تشوفو بجوجل قبل وبعد جدا عجيب 

ثانيا، لازم تراعي لما تاخذي ديرما رولر:

1. ان الاستخدام شخصي لك انتي فقط عشان تتجنبي المشاكل الجلديه اللي ممكن تصير لو استعملتيها مع احد ثاني .. لانك تتعاملي مع ( ابر )
2. النظافه التامه للجهاز ،، استخدمي كحول لتنظيفه قبل وبعد الاستخدام ولا تستخدمي ماي علشان ما تصدأ الابر 
3.   نظافه وجهك ،، نظيف ما فيه ميك اب ،، ومغسول 
4. الديرما رولر ما تنحط على مناطق فيها حبوووووب ابدا ابداااا

ثالثا، خطوات الإستخدام :

على وجه نظيف مرري تونر علشان تتأكدي ما فيه بقايا اوساخ او ميك اب انا استخدم تونر الساحرات ،، وبايو ديرما ومزيل الميك اب المائي من جارنيير .. كلهم زينين..

ابدي بالجهاز، استهدفي المناطق المصابه عندك فقط . مرري الجهاز ٥-١٠ مرات بكلالاتجاهات ( فوق الى تحت - يمين لليسار - بشكل مائل ) وخذي راحتك امشيبالخفيف ولا تضغطي بالجهاز على بشرتك.. 

لما تخلصي كامل المناطق المصابه وجهك اكيد بيكون احمر وممكن يكون فيه حرقان خفيف يعتمد على بشرتك، خذي لك  قطنه ونظفي وجهك بتونر مره ثانيه 

حطي سيروم او اي حاجه علاجيه تستهدف مشكلتك ،، مثلا سيروم للتجاعيد ، سيروم يفتح البقع ،، كذا .. لان البشره بعد الديرما رولر تتفتح وتصير قابله انها تمتص اي منتج ،، والسيروم معروف انه خفيف وتمتصه البشره بسرعه..  انا بالنسبه لي استخدم تريتمنت الريجمنت للحبوب مرره حابه النتيجه.

اخر خطوه، رطبي وجهك بمرطبك اليومي ،، انا استخدم بعد مرطب الريجمنت ،، خفيف وطبي وما يسكر المسامات ..

 

الجهاز محتاج صبر ،، مثل ما خبرت شعب السناب شات لو ما عندك صبر لا تخسري فلوسك عليه ♥ اخذت جهازي من امازون ..

اتمنى استفدتو من الموضوع ،، اي سؤال او استفسار حطوه بالكومنت تحت علشان الكل يستفيد .. احبكم 

انتهى ♥